इसरोकार संवाददाता माघ १५, काठमाडौं– प्रधानमन्त्री पुष्पकमल दाहाल प्रचण्डले निर्वाचनको मिति केही दिन भित्रै घोषणा हुने बताईरहेका बेला आज संयुक्त लोकतान्त्रिक मधेसी मोर्चाको वैठक बस्दैछ । निर्वाचन सम्बन्धि कानुन बनाउने कामलाई तीव्रता दिइएको र केही दिन भित्रै स्थानीय तहको निर्वाचनको मिति घोषणा हुने प्रधानमन्त्रीको भनाई छ ।
तर, संविधान संशोधन र सरकारको चुनावी तयारीपछि संयुक्त लोकतान्त्रिक मधेसी मोर्चा नयाँ रणनीति बनाउन थालेको छ । मोर्चाले आफूहरुको माग समेटेर संविधान संसोधन गर्न सरकारलाई अल्टिमेटम दिने तयारी गरेको छ । सरकारले भने मधेशी मोर्चाका माग समेत समेटेर संशोधन प्रस्तावमाथि पुरक प्रस्तावको तयारी गरेको छ ।
शुक्रबार बसेको मधेसी मोर्चाको बैठकले माघ महिनाभित्र आफूहरुका माग सम्बोधन गरेर संविधान संसोधन गर्न अल्टिमेटम दिने तयारी गरेको थियो । प्रमुख दलहरु संविधान संसोधन भन्दा पनि निर्वाचनमा बढी केन्द्रीत भएकाले मोर्चाले संसोधनका लागि अल्टिमेटम दिन लागेको जनाएको छ ।
बैठकपछि राष्ट्रिय मधेस समाजवादी पार्टीका महासचिव केशव झाले संविधान संसोधन प्रक्रिया अघि नबढाएसम्म निर्वाचन प्रक्रिया अघि बढ्न नदिने बताएका थिए । उनले सरकारले आफूहरुको माग पूरा गर्नुको सट्टा स्थानीय तह पुनसंरचना आयोगको प्रतिवेदन सच्याउने कुरा गरेर झुक्याउन खोजेको आरोप पनि लगाएका थिए ।
मोर्चाले सरकारसँग भएको तीन बुँदे सहमतिका विषयमा स्वेतपत्र जारी गरेर फागुनबाट आन्दोलन गर्ने तयारीसमेत गरेको छ ।
प्रतिक्रिया लेख्नुहोस्:-