विराटनगर, माघ २२ – नेकपा एमालेका अध्यक्ष केपी शर्मा ओलीले पुष्पकमल दाहाल प्रचण्ड नेतृत्वको सरकारले चुनाव नगराए सरकार ढाल्ने चेतावनी दिनु भएको छ ।
प्रेस चौतारी नेपालको १९ औँ स्थापना दिवसको सन्दर्भमा सम्बोधन गर्दै अध्यक्ष ओलीले अहिलेको जस्तो सहज वातावरणमा पनि निर्वाचन नगराए एमाले चुप लागेर नबस्ने बताउनु भयो ।
प्रचण्ड नेतृत्वको सरकार चुनाव नगराउने षडयन्त्रमा लागेको भन्दै तत्काल चुनावको मिति घोषणा नगरे एमालेले कुनैपनि बेला प्रचण्ड नेतृत्वको सरकारलाई अप्ठेरोमा पार्न सक्ने चेतावनी दिनुभएको हो । २०७४ माघ सम्ममा चुनाव गराउन नसके देशमा ठूलो संकट आउने भन्दै उहाँले यस्तै अबस्था रहे एमाले चुप लागेर नबस्ने बताउनुभयो । ‘सरकार चुनावमा नगएर संवैधानिक र राजनीतिक संकट सिर्जना गराउन खोज्दैछ’ ओलीले भन्नुभयो, ‘एमालेले त्यो अवस्था आउनुभन्दा अगावै संकटबाट बच्ने उपाय गराएर छाड्छौं ।’
नेकपा एमाले कुनै पनि कुराको इच्छामात्रै गरेर बस्ने पार्टी नभएको भन्दै एमाले गरेर देखाउने पार्टी भएकोले यस्तै अबस्थामा चुप लागेर नबस्ने र केही गरेर देखाउने उहाँले बताउनुभयो ।
एमाले अध्यक्ष ओलीले प्रचण्ड प्रधानमन्त्रीमा छानिएको ६ महिना ४ दिन बितिसक्दा पनि केही काम नगरेको आरोप लगाउनुभयो । प्रचण्ड नेतृत्वको सरकारले एमाले काँही भेटिन्छ कि र हटाउन सकिन्छ कि भनेर खोज्दै आफ्ना कार्यकर्ता नियुक्ति गर्ने बाहेक कुनै उपलव्धीको काम गर्न नसकेको अध्यक्ष ओलीले आरोप लगाउनुभयो ।
पत्रकारिताको धर्म र मर्म अहिलेको आवश्यकता रहेको औल्याउँदै ओलीले अहिलेको अवस्थामा चुनावको माहोल तयार हुने खालका समाचार सम्प्रेषण गर्न आग्रह गर्नुभयो । प्रचण्ड नेतृत्वको सरकारले गरेका निर्णयहरुलाई समर्थनमा समाचार लेख्नेहरुलाई ‘भाडाका पत्रकार’को आरोप लगाउँदै चुनावको माहौल तयार गर्न र सरकारलाई दबाव सिर्जना गर्न पत्रकारहरुहरुलाई सुझाव दिनुभयो ।
‘सरकारले गर्नुपर्ने काम कर्तव्यका बारेमा पत्रकारले कलम चलाउनुपर्छ, तर केही भाडाका पत्रकारहरुले देश र जनताको हितभन्दा पनि सरकारको हित अनुकुल कलम चलाउने गरेका छन्’ ओलीले असन्तुष्टी जनाउनुभयो ।
प्रतिक्रिया लेख्नुहोस्:-