बाघ मारिएको घटनाको छानविन गर्न एक छानविन समितिको गठन

फागुन १ – पर्साको लखनपुरमा बाघ मारिएको घटनाको छानविनका गर्न एक छानविन समिति गठन गरिएको छ । क्षेत्रीय वन निर्देशक गणेश झाको नेतृत्वमा छानविन समिति गठन गरिएको हो । बाघ संरक्षित तथा लोपोन्मुख जनावर भएकाले घटनाबारे विश्व वन्यजन्तु संरक्षण कोषले समेत चासो देखाएको छ ।
कोषको चासोपछि छानविन टोली गठन भएको हो । बाघलाई नियन्त्रण गर्न सकिने अवस्था रहेपनि प्रमुख जिल्ला अधिकारीको आदेशमै बाघलाई गोली प्रहार गरी मारिएको आरोप स्थानीयवासीको छ । तर, पर्साका प्रमुख जिल्ला अधिकारी केशवराज घिमिरेले गोली चलाउने प्रहरीलाई आदेश नदिएको बताए । उनले सुरक्षाकर्मीमाथि बाघले आक्रमण गरेका कारण आत्मरक्षाको लागि गोली चलाएको जानकारी आफुले पाएको बताए ।

गत मंगलबार पर्सा वन्यजन्तु आरक्षबाट निस्केर लखनपुर–७ एकडर्वा गाउँमा बाघ पुगेको खबरपछि नियन्त्रण गर्न गएको पर्सा प्रहरीको टोली र गाउंलेमाथि बाघले आक्रमण गर्दा प्रहरी निरीक्षकसहित ९ जना घाइते भएका थिए । प्रहरीको गोली लागि मरेको बाघको बिहीबार पोष्टमार्टम गरेको थियो । मारिएको बाघको छाला, पन्जा र टाउको बन विभागमा पठाइएको जिल्ला वन कार्यालय पर्साका प्रमुख चन्द्रदेवलाल कर्णले जानकारी दिए ।