लेस्टर सिटीको फेरि हार

फागुन २ – इंग्लिस प्रिमियर लिगमा लगातार पाँच खेलमा पराजित भएको साबिक विजेता लेस्टर सिटी रेलिगेशन जोनको नजिक पुगेको छ । लिग अन्तर्गत आइतबार राति भएको खेलमा लेस्टर सिटी स्वान्सी सिटीसँग पराजित भयो ।

घरेलु मैदानमा भएको खेलमा स्वान्सी सिटीले लेस्टरलाई २–० ले हराएको हो । स्वान्सीको जितमा एल्फी मावसन र मार्टिन ओल्सनले गरे । ३६ औं मिनेटमा मावसनले गोल गर्दै स्वान्सीलाई सुरुवाति अग्रता दिलाए । पहिलो हाफको इन्जुरी समयमा ओल्सनले स्वान्सीको अग्रता दोब्बर पारे । पहिलो हाफमा २–० ले पछि परेको लेस्टर सिटीले दोस्रो हाफमा खेलमा फर्किने प्रयास गरे पनि सफल हुन सकेन ।

लेस्टर सिटीले सन् २०१७ मा अहिलेसम्म लिगमा एक गोल पनि गर्न सकेको छैन । लेस्टर सिटी सन् १९५६ पछि लिगमा लगातार पाँच खेल हार्ने पहिलो साबिक विजेता बनेको छ । सन् १९५६ को मार्चमा पनि अघिल्लो वर्षको विजेता चेल्सी लगातार पाँच खेलमा पराजित भएको थियो ।

हारपछि लेस्टर सिटी १७ औं स्थानमा झरेको छ र उ रेलिगेशन जोनबाट एक अंक मात्रै माथि छ । लिगमा लगातारको पाँचौं हारले लेस्टरलाई रेलिगेशनमा पर्ने खतरामा पुर्‍याएको छ । उसको २५ खेलबाट २१ अंक मात्रै छ । लेस्टरलाई हराएको स्वान्सी सिटी २५ खेलबाट २४ अंकसहित १५ औं स्थानमा छ ।