इसरोकार संवाददाता काठमाडौैं, चैत ११ – निर्वाचन आयोगले आशन्न स्थानीय तहको चुनावमा अनुगमनसम्बन्धी बेग्लै निर्देशिका ल्याउँदैछ । आगामी वैशाख ३१ गते स्थानीय चुनावमा हुने सबै प्रक्रियाको अनुगमनका लागि त्यस्तो निर्देशिका बन्दै गरेको र चाँडै जारी हुने आयोगका प्रवक्ता सूर्यप्रसाद शर्माले जानकारी दिनुभयो ।
आयोगले यसअघि निर्वाचन आचारसंहिता अनुगमन निर्देशिका–२०७३, स्थानीय तह निर्वाचन पर्यवेक्षण नीति र निर्देशिका–२०७३ जारी गरिसकेको छ । आयोगमा पर्यवेक्षण पाउँ भनी संस्थागत आवेदन दिने क्रम सुरु भएको छ । यस्तै आयोगले मतदाता शिक्षा कार्यक्रम कार्यान्वयन निर्देशिका–२०७३ पनि जारी गरिसकेको छ । निर्वाचन ऐन, २०७३ को दफा ४४ बमोजिम ती निर्देशिका जारी भएका हुन् ।
स्थानीय तह निर्वाचन पर्यवेक्षण नीति र निर्देशिकामा निर्वाचनलाई स्वतन्त्र र निष्पक्ष रुपमा निर्वाचन सम्पन्न गराउन गोप्य मतदानबाहेकका अन्य प्रक्रियामा अधिकतम् पारदर्शी बनाइने उल्लेख छ । सोका लागि पर्यवेक्षक हुने संस्था र व्यक्तिलाई अभिमुखीकरण र क्षमता विकास गरी खटाउने आयोगको नीति छ ।
प्रतिक्रिया लेख्नुहोस्:-