त्रिशुलीमा बस खस्दा ६ जनाको मृत्यु

चितवन  १३ मंसिर  त्रिसुलीमा बस खस्यो पृथ्वी राजमार्गअन्तर्गत चितवनको फिस्लिङबाट त्रिशूली नदीमा बस खस्दा ६ जनाको मृत्यु भएको छ ।

काठमाडौंबाट अर्घाखाँची जाँदै गरेको लु २ ख २९१ नम्बरको बस चितवनको इच्छा कामना गाउँपालिका–४ स्थित फिस्लिङबाट त्रिशुली नदीमा खसेर दुर्घटना भएको हो । विपरित दिशाबाट आएको ना ६ ख ४९७२ नम्बरको ट्रकसँग ठोक्कीदा बस नदीमा खसेको हो । दुर्घटनामा मृत्यु भएकाहरुको सनाखत हुन सकेको छैन । बस पूर्णरुपमा त्रिशूलीमा डुबेको छ । दुर्घटनाग्रस्त बसबाट २० जना घाइतेको उद्धार गरिएको चितवन प्रहरीले जनाएको छ । उनीहरुलाई चितवन मेडिकल कलेजमा उपचारका लागि भर्ना गरिएको छ । बसमा कति यात्रु थिए भन्ने अझै खुलेको छैन । दुर्घटना लगत्तै नेपाली सेना, नेपाल प्रहरी, सशस्त्र प्रहरी र स्थानीयबासिन्दा उद्दारमा जुटेका छन् ।