इसरोकार संवाददाता ११ माघ,चौतारा । निर्वाचन क्षेत्र पुर्वाधार विशेष कार्यक्रम मार्फत प्रत्यक्ष निर्वाचित सांसदहरुलाई विकासका लागि आउने ३ करोड रुपियाँ एकलौटी रुपमा बाँडफाँड गरेपछि यतिबेला सिन्धुपालचोक जिल्लाका तीन सांसदहरुको लफडा सुरु भएको छ ।
क्षेत्र नम्बर ३ का एमाले सांसद शेरबहादुर तामाङले एकलौटी रुपमा एमाले कार्यकर्ताको सल्लाहमा बजेट बिनियोजन गरेपछि समानुपातिक तर्फका सांसदहरु रमेश लामा र ल्यारक्याल लामा तामाङ विरुद्ध खनिएका छन् । रमेश राप्रपाका सांसद हुने भने ल्हारक्याल माओवादी केन्द्रका ।
जिविसमा झण्डै हानाहान
समानुपातिकबाट निर्वाचीत सांसदहरुसँग सरसल्लाहमा बजेट विनियोवन गर्नु पर्ने प्रावधान भएपनि एमाले सांसद तामाङले पार्टी नेतृत्वसँग समेत छलफल नगरी ‘कमिशन’ आउने योजनाहरुमा मात्रै बजेट हालेको भन्दै एमालेभित्रैबाट पनि आलोचना भइरहेको छ ।
दुवै समानुपातिक सांसदसँग छलिएर हिडिरहेका तामाङलाई केही दिनअघि जिविसले सांसदहरुसँग आयोजना गरेको बैठकमा समानुपातिक सांसदले घेरा हालेका थिए । समानुपातिक सांसदद्धय ल्यारक्याल र रमेश लामा एउटै टेबलुमा भएपछि तामाङसँग झण्डै हातहालाहालको अवस्था समेत भएको थियो ।
बैठकमा सहभागी अरु सांसदहरुले ‘यो विषयमा पछि तपाँइहरु मात्रै छलफल गर्नुहोस अहिले जिविसले राखेको एजेण्डामा छलफल सुरु गरौ’ भनेपछि दुवै समानुपातिक सांसदहरु केही बेर मौन बसेका थिए । जिविसका एजेण्डा सकिन साथ अरु सासंदहरुले यसको समन्वय गर्ने काम स्थानीय विकास अधिकारीको भन्दै हिडेका थिए । अरु सासंद हिडेपछि स्थानीय विकास अधिकारी कृष्णबहादुर शाही र तिन सांसदबिच झण्डै दुइ घण्टा छलफल भएपनि कुरा टुङ्गोमा पुग्न सकेन ।
प्रतिक्रिया लेख्नुहोस्:-