१२ असार, माङसेबुङ । पत्रकारिता क्षमता अभिवृद्धि कार्यक्रम अन्तर्गत माङसेबुङ गाउँपालिकामा तीन दिने आधारभूत पत्रकारिता तालिम सम्पन्न भएको छ ।
माङसेबुङ गाउँपालिकाको सहयोगमा माङसेबुङ मासिक पत्रिकाले आयोजना गरेको तालिममा विभिन्न ६ वडाका १३ महिलासहित २६ जनाको सहभागिता रहेको थियो । माङसेबुङ–५ स्थित रेडियो माङसेबुङको सभाहलमा आयोजितमा नेपाल आदिवासी जनजाति पत्रकार महासंघ (फोनिज) का सङ्घीय सचिव कमन देवानले सहजीकरण गरेका थिए ।
तालिम समापन कार्यक्रममा बोल्दै प्रस्तावित सेइङ आत्मानन्द लिङ्देन बहमुखी क्याम्पसका प्रमुख होम लिङ्देनले पत्रकारिता तालिमबाट सिकेका ज्ञानलाई समाजको विकासमा उपयोग गर्न सहभागीलाई सुझाव दिए । माङसेबुङ मासिकका कार्यकारी सम्पादक ज्ञानु केदेमले ६ वटै वडाका इच्छुकहरुलाई तालिममा सहभागी गराइएको जानकारी दिए ।
तालिमको समापनमा माङसेबुङ मासिक पत्रिकाका प्रकाशक धनबहादुर थेबेको अध्यक्षता रहेको थियो भने स्वागत आन्छुमे नाशान र सञ्चालन सुनिल शेर्माले गरेका थिए ।
असार ८ गते सुरु भएको तालिमको उद्घाटन माङसेबुङ गाउँपालिका वडा नम्बर ५ का वडा अध्यक्ष नरेन्द्रकुमार राईले गरेका थिए ।
प्रतिक्रिया लेख्नुहोस्:-